அதற்காக வருத்தமில்லை திரு. ஸ்டீவ் ஜாப்ஸ்!

அன்பார்ந்த திரு. ஸ்டீவ் ஜாப்ஸ்...

கடந்த மாதம் உங்கள் ஆப்பிள் நிறுவனத் தலைமை பதவியை நீங்கள் ராஜினாமா செய்தபோதே உங்களை குறித்த - ஜெப்ரியஸ் மற்றும் வில்லியம் சைமன் இணைந்து எழுதிய ஐ.கான் - ஸ்டீவ் ஜாப்ஸ் நூலை வாசித்திருந்தேன். மன்னியுங்கள் திரு ஸ்டீவ்ஜாப்ஸ்! அது உங்கள் அனுமதி பெறாத வாழ்க்கைச் சரிதை என்பது தெரியும். அதை வெளியிட்டதற்காக ஜான் வில்லி அண்ட்சன்ஸ் புத்தகப் பதிப்பாளர்களின் ஏனைய நூல்களையும் உலகெங்கும் உங்கள் ஆப்பிள் வர்த்தகக் கடைகளிலிருந்து எடுத்து ‘விற்பனைத் தடை’ விதித்து நீங்கள் ஆத்திரத்தோடு வீசி எறிந்தீர்கள்... கிட்டத்தட்ட அந்த சம்பவம் நடந்து கொண்டிருக்கும் போதுதான் அந்த நூலை நான் வாசித்துக்கொண்டிருந்தேன்.

ஆனால் உங்கள் முழு ஆசீர்வாதத்தோடு டைம்ஸ் இதழ் பிரதிநிதி சி.என்.என்.. மூத்த பத்திரிகையாளர் வால்டர் ஐசக்சன் (water isaacson) எழுதி நீங்கள் இறந்தபின் வெளிவந்து வசூலில் சாதனை படைத்த ஸ்டீவ்ஜாப்ஸ் தி எக்ஸ்குளூசிவ் பயோக்கிரஃபி நூலைவிட ஐ.கான் புத்தகம் உங்களை குறித்து பல நேர்மையான சிறப்புச் செய்திகளை கொண்டுள்ளது என்பதை (காலதாமதமாக வேணும்) உங்கள் கவனத்திற்கு கொண்டு வருகிறேன். குறிப்பாக பிராஸ்கரட் சர்வதேச புத்தக கண்காட்சியில் ஐ-கான் புத்தகம், எக்ஸ்குளூசிவ் பயோகிரஃபியை விட கூடுதல் கவனம்பெற்று உலக அளவில் அதிக வாசகர்களால் விரும்பப்படும் நூலாக அறிவிக்கப்பட்டுள்ளது. உங்கள் மரணத்திற்கு பிறகு என்பதால் உங்களுக்குத் தெரியாமலும் இருக்கலாம்.

உங்களையும் உங்களது கணினி வர்த்தக உலகையும் புரிந்துகொள்ள யாராவது விரும்பினால் அவர்களுக்கு (உங்களால் அங்கீகரிக்கப்படாத) தாமஸ் எல்.பைர்ட் மானின் தி வேல்டு இஸ் பிளாட் (the world is flat), லியாண்டர் கானே எழுதிய இன்சைட் ஸ்டீவ்ஸ் பிரெயின் (Inside steves Brain), கார்மி காலோ எழுதிய தி பிரசன்டேஷன் சீக்ரட்ஸ் ஆஃப் ஸ்டீவ் ஜாப்ஸ் The presentation Secrets of Steve Jobs) என சில புத்தகங்களை முன்மொழியும் அளவிற்கு வாசித்து வைத்திருந்தேன்.

குறிப்பாக தி வேல்டு இஸ் ஃபிளாட் புத்தகம்! உங்களோடு சேர்ந்து ஸ்டீவ் வாஸ்னெக், மைக் மார்க்குலா ஆகியோர் கணினியை வர்த்தகப் பொருளாக்கி எப்படியெல்லாம் உலகம் ஒரு கிராமமாக (குளோபல் வில்லேஜ்) சுருங்கிட புதியபுதிய கண்டுபிடிப்புகளைக் கொண்டு வந்தார்கள் என்பதை விவரிக்கிறது. உங்களைப் போலவே, கணினி உலகின் நூலாசிரியர்களும் நம்புவது ‘மார்க்சியம் காலாவதியாகி விட்டது’ அதே வித செய்திகள் இந்த புத்தகத்திலும் இட்டுக்கட்டப் பட்டிருப்பினும், உங்களது பங்களிப்பு குறித்த நேர்மையான பதிவு இதில் உள்ளது. நேனோ தொழில் நுட்பம் சார்ந்து ரிச்சர்ட் ஃபைன்மெனும் சர்க்யூட் போர்டு சார்ந்து சோடியும் நிகழ்த்திய முக்கிய திருப்புமுனைகள் சார்ந்ததே உங்களது வர்த்தகம் என்பதை நிறுவியுள்ளது. எனவே இந்த புத்தகம் உங்களுக்குப் பிடிக்காலும் போகலாம். குறிப்பாக உலகெங்கும் ஆப்டிகல் ஃபைபர் மின் இழைகளின் தொடர்பு கடல்கடந்தும் நாடுகளை வளைத்திருக்காவிட்டால்... ஆப்பிளும்... கூகுலும்... மைக்ரோ சாஃப்டும் உங்கள் சன்னல்களைத் திறந்திருக்க முடியாது என்பதைப் பதிவதோடு வால்-மார்ட் வணிகத்திற்கான ஆப்பிளின் பிரத்யேகப் பங்களிப்பையும் தனி அத்தியாயமாய் இந்த நூல் விவரிப்பதை தங்கள் கவனத்திற்கு (உங்களுக்கு நேரமிருந்திருக்காது) கொண்டுவர விரும்புகிறேன்.

ஐ-கான் நூலில், ஜெராக்ஸ் (நகல்) மிஷினை உங்கள் மவுஸ் மற்றும் அச்சீட்டோடு (பிரிண்டர்) இணைத்து நீங்கள் ஆப்பிள் லிஸாவையும், ஒராண்டிற்கு பிறகு மாசின்டோஷ் (உலகின் முதல் ஸ்கானர்) இயந்திரத்தையும் அடைந்ததைப் பதிவு செய்துள்ள நூலாசிரியர்கள். உங்களை இருபதாம் நூற்றாண்டு எடிசனாகவும், 21ம் நூற்றாண்டு ஃபோர்டாகவும் வர்ணிக்கிறார்கள். நீங்கள் கண்டடைந்த அதே ஆப்பிள் நிறுவனத்திலிருந்து நீங்களே 1985ல் ஜான் ஸ்கூலி (உங்களால் நியமிக்கப்பட்ட அதிகாரி) யால் வெளியேற்றப்பட்டதையும் அதே ஆண்டில் Next நிறுவனத்தை ஏற்படுத்தி முதன்முதலில் அவுட் சோர்சிங் (அயல் வேலைவாய்ப்பு) என்பதை உலகில் ஏற்படுத்தியதையும் கூட உங்கள் ஆதரவுப் பார்வை யாலேயே பதிவு செய்கிறார்கள்.

சிரியாவிலிருந்து அமெரிக்காவுக்கு இடம்பெயர்ந்த அப்துல்ஃபாட்டா ஜான்டாலி தனது கல்லூரியில் காதல் கொண்ட ஜோன் ஷீபில் கெட்ட கனவாக உங்களை (திருமணத்திற்கு முன்) பெற்றெடுக்க.. உலகக் குழந்தை மார்க்கெட்டில் பால் ஜாப்ஸிற்கு (தத்தாக) விற்கப்பட்டதால் உங்கள் பிறப்பே ஒரு வர்த்தகமாய் ஆனதை ஐ-கான் பதிவு செய்ததால் அந்த புத்தகம் உங்களுக்குப் பிடிக்க வில்லையா... ஆனால் உங்கள் வாழ்வின் வெற்றித்தருணங்களை ஐ-கான் புத்தகம் பதிவு செய்யத் தவறவில்லையே திரு. ஸ்டீவ் ஜாப்ஸ்... குறிப்பாக அந்த 1970களின் வலிமிகுந்த உங்கள் வாழ்க்கை.. கல்லூரியில் முதலாண்டு படித்ததுமே வறுமை, வெறுமை உங்களை விரட்டி கல்லூரியில் முதலாண்டு ‘டிராப்-அவுட்’ ஆக்கியதிலிருந்து நண்பர் வாஸ்னிக்கோடு பலவகையான வேலைகள் செய்து, நண்பர்கள் அறைகளின் கட்டாந் தரையில் படுத்துறங்கிய நாட்களை.. அப்புறம் இந்தியாவிற்கு போதி மரத்தடியைத் தேடிவந்து மொட்டைபோட்டு புத்த மதத்தைத் தழுவியது. ஏன் பல மைல்கள் நடந்தே போர்ட்லாந்து ஹரே கிருஷ்ணா கோவிலுக்குச் சென்று வாரம் ஒரு முறை முழு அன்னதான சாப்பாடு சாப்பிட்டு வந்த - கடினமான மதிய ஞாயிறுகள்... ஆனால் வளர்ப்புத் தந்தை பால் ஜாப்ஸ் குறித்தும், உங்களது நாலாம் வகுப்பின் (வீட்டுப்பாடம் முடித்து வந்தால் காசு முதற்கொண்டு தந்த) ஒரே நல்ல ஆசிரியை குறித்தும் கூட ஜெப்ரி-யங்கும் வில்லியம் சைமனும் தங்களது ஐ-கான் புத்தகத்தில் விரிவாக எழுதி இருக்கிறார்கள்.

திரு. ஸ்டீவ் ஜாப்ஸ், ஐ-பாட், ஐ-பேட் (I-Pad) மற்றும் ஐஃபோன் இவற்றை ஆப்பிளுக்கு 1997ல் திரும்பிய பிறகு நீங்கள் அறிமுகம் செய்ததை அழகாகவும் மிகவும் சுவையாகவும் எடுத்துரைத்தாலும் ‘தி வேர்ல்டு இஸ் பிளாட்’ புத்தகத்தை நீங்கள் நிராகரிப்பதற்கு முக்கியக் காரணம் ஒன்று உண்டு. அது உங்களது Next நிறுவனத்தின் தோல்வியையும், மைக்ரோ சாஃப்ட் போலவே நீங்களும் குட்டிக்குட்டி முதலீட்டாளர் பங்குகளை (வால்ட் டிஸ்னி உட்பட) எப்படி விலை கொடுத்து மொத்தமாக வாங்கி முதுகில் குத்தினீர்கள் என்பதையும் சேர்த்தே அந்தப் புத்தகம் உலகிற்கு வெளிச்சம் போட்டு விடுகிறது.

அவுட் சோர்ஸிங் என்று பெயரிட்டு அமெரிக்காவிற்கு வெளியே மூன்றாம் உலக நாடுகளின் மத்தியதர வரக்கத்து இல்லத்தரசிகள் (?) வரை உழைப்பை சுரண்டும் உங்கள் கணினி உலகின் உன்னத திட்டம்தான் கார்ல்மார்க்ஸ் பற்றி உங்களைத் திருவாய்மலரச் செய்திருக்க வேண்டும் திரு. ஸ்டீவ் ஜாப்ஸ். நீங்கள் மட்டுமல்ல தி வேர்ல்டு இஸ் ஃபிளாட் (the world is flat) நூலாசிரியர் தாமஸ் எல். பிரைட்மான் உட்பட ஏன் எல்லாரும் சொல்லி வைத்தாற்போல மார்க்ஸியத்தை காழ்ப்புணர்சியோடு கண்டிப்பதை உங்கள் (ஜீன்ஸ், கருப்பு (காலர் இல்லாத) முழுக்கை-டி-சர்ட் போலவே) பேஷன் ஆக்குகிறீர்கள்?

• மார்க்ஸியம் - நாட்டில் எல்லாரையும் சமஅளவு ஏழைகளாக்கும் தத்துவம்
• கார்ல் மார்க்ஸை விட சமூகத்திற்கு எடிசன் அதிக பங்களிப்பு நிகழ்த்தி இருக்கிறார் (எனவே நான் எடிசன் ஆகவே விரும்பினேன்)

உங்களுடைய ஐ-பாட், ஐ-ஃபோன் போல மேற் கண்ட வாசகங்களும் உங்கள் அரிய கண்டுபிடிப்பு திரு.ஸ்டீவ் ஜாப்ஸ். திவேர்டு இஸ் ஃபிளாட் நூலில் அவுட் சோர்ஸ் குறித்தும், இந்தியாவைத் தவிர்த்து சீனாவில் ‘ஆப்பிள்’ நிறுவன உதிரியாகத் தொழில் கேந்திரங்கள் அமைத்தது குறித்துமான உங்கள் கருத்துக்கள் இரண்டு பதிவாகி உள்ளன. மார்க்ஸியத்தைப் பற்றி விவரிக்கவும் வாதிடவும் இது தருணமல்ல என்றாலும், அந்த இரண்டு கருத்துக்களின் பின்னணி போதும், உங்கள் ‘மார்க்ஸிய’ கிலிக்கான காரணத்தை அறிய...

• அவுட்சோர்ஸிங் பற்றி 1994 ஆப்பிள் நிறுவன பங்குதாரர் கூட்டத்தில் கூறுகிறீர்கள் :

“நாம் அச்சப்படத் தேவையில்லை. அவுட்சோர்ஸிங் மூலம் பல நாடுகளில் பகலும் இரவும் நமது வேலை நடக்கிறது. அவர்கள் ஒருவரை ஒருவர் அறிவது கூட இல்லை... நமக்கு தொழிற்சங்க பிரச்சனையே கிடையாது.”

• சீனத்தில் (இந்தியாவிலன்றி) ஏன் தொழிற்கேந்திரம் அமைத்துள்ளோம் என்பதற்கு டைம்ஸ் இதழுக்கு ‘ஐ-டியூன்ஸ்’ அறிமுகம் செய்து 2005ல் பேட்டியளிக்கிறீர்கள்.

“தொழிற்சங்க அரசாங்கமே (The Govt of trade Union) சீனாவில் இருப்பதால் அது எங்களுக்குத் தொழிலாளர் ஊதிய-வேலை நேரப் பிரச்சனை வராமல் தடுத்துவிடும்...”

‘ஐரோப்பாவைப் பிடித்து ஆட்டும் பூதம்’ உங்களையும் விட்டு வைக்கவில்லை அல்லவா! உங்கள் நிறுவனங்களில் பணிபுரியும் லட்சக்கணக்கானவர்கள் தினமும் வேலைக்குள் நுழைய அவர்களது இ-மெயில் திறந்து ‘அந்த’ பிங்க் நிற வேலை கல்தா தபால் இருக்கிறதா இல்லையா என பார்த்த பிறகே வேலையைத் தொடர முடியும் என்பது இன்றைக்கும் உண்மை தானே. அதனையும் சேர்த்தே ஐ-கான் புத்தகம் வெளிச்சமிட்டதால் அதன் மீது ஆத்திரம் கொண்டீர்களா திரு. ஸ்டீவ் ஜாப்ஸ்?

ஆனால் உங்கள் மரணம் மிகவும் துரதிர்ஷ்டமானது. உலகின் மூன்றாவது செல்வந்தராக உயர்ந்த நீங்கள் கூட கணையப் புற்றுநோய் கடுமையாய்த் தாக்கிய ஆண்டுகளில் உங்களோடு இருக்க, அதே பெற்றோர்க்கு பிறந்த பின்நாட்களில் நீங்கள் கண்டுபிடித்த உங்கள் சகோதரி மோன சிம்ப்சன் அனுமதிக்கப்பட்டதே பெரிய அதிசயம் என்கிறார்கள். பிரபல நாவலாசிரியையான அவர் உங்களை வைத்து ‘எ ரெகுலர் கை’ (A regular guy) நாவல் எழுதினாரே... அதையும் அங்கீகரிக்க ஏன் தவறினீர்கள் திரு. ஸ்டீவ் ஜாப்ஸ்...

அந்த நாவலின் கதாநாயகன் (உங்களைப் போலவே இருக்கும் டாம் ஓவன்ஸ்).. தன் இரண்டு பெண் தோழியர்களை நண்பனிடம் காட்டி (உங்களைப் போலவே) யார் அழகு என கேட்டறிந்து ஒருத்தியை மணப்பதாலா.. அல்லது, (உங்களைப் போல) தனது முதல் மகளை ஈவு இரக்கமின்றி (தன்னைப்போல வளரட்டும் என்று) அனாதை விடுதிக்குத் துரத்துவானே அதனாலா. கோடி கோடியாய் குவித்ததை - எய்ட்ஸ் போன்ற நோய்தடுப்பிற்கு பில்கேட்ஸ் செலவு செய்வதைக் கண்டு (உங்களைப் போலவே) பைத்தியக்காரன் எனப் பரிகசித்து... ஒரு டாலர்கூட தரமுடியாது என முறைப்பானே... அதனாலா..!

என்றாலும் திரு. ஸ்டீவ் ஜாப்ஸ், உலகில் இன்று கணினி முதல் ஐ-ஃபோன் வரை யாவையும் வர வழிகாட்டியுள்ள உங்களால் உலகம் (வேற்றுமைஇன்றி) மேடுபள்ளமின்றி ஃபிளாட் (Flat) ஆகிவிட்டதாக தாமஸ் எல்.பிரைட்மான் தனது வேர்ல்டு இஸ் பிளாட் புத்தகத்தில் குறிப்பிடுகிறார். உலக மூலதனத்தை தன்னகப்படுத்தி ஒரே அச்சில் வார்த்து முதலாளியம் வர்க்கங்களுக்கு இடையில் ஏழை - செல்வந்தர் வேற்றுமையை அதீதமாய் பெருக்கி ஊழித்தாண்டவம் ஆடும் இன்றைய சூழலில் உங்கள் இணையதள ஏ.சி. மூலைகளை விட்டு வெளியே வந்து பார்த்திருந்தால் உலகம் - தட்டையான சீரான - ஒன்றல்ல என்பதை உணர்ந்திருப்பீர்கள்.

உங்கள் வருகைக்காக கட்டப்பட்ட ஆறுசாலை மேம்பாலங்களுக்கும் ஐ.டி. காரிடார் சாலை மேடுகளுக்கும் அடியில் பார்த்திருந்தால் தெரிந்திருக்கும் அழித்தொழிக்கப்பட்ட குடிசைப் பகுதிகளும் வயிறு உப்பியபடியே குழந்தைகள் கழியும் எங்கள் வறுமையும்...

ஆனாலும் திரு. ஸ்டீவ் ஜாப்ஸ் எங்களிடமும் ஐ.பாடும், ஐ.போனும் உண்டு. எதுவுமே நிஜமல்ல (அதைவிட நன்றாக வேலை செய்யும்) நகல்கள்...!

சாலைக் கடைகளில் கொட்டிக்கிடக்கும் மலிவான எங்கள் வாழ்க்கை உங்களைப் பற்றிய மேற்கண்ட புத்தகங்களைக்கூட சாலை பிளாட்பாரத்தில் மலிவு விலை - பழைய புத்தக சந்தையில் தான் வாங்கி என்போன்றவர்களால் வாசிக்க முடிகிறது...! உங்கள் வார்த்தையிலேயே சொல்வதானால்  India is a country of Pyracy!! அதற்காக வருத்தமில்லை திரு. ஸ்டீவ் ஜாப்ஸ்.

-இரா.நடராஜன்