அந்த அதிகாலையில் அப்படி ஒரு போராட்டம் நடக்கும் என்று யாரும் நினைத்திருக்கமாட்டார்கள். ஆன்மீக நகரமாக அடையாளப்படுத்தப்பட்டுக்கொண்டிருக்கும் திருவண்ணாமலையில் எந்த நாளும் திருவிழாதான்.இங்குள்ள அண்ணாமலையார் கோவிலில் தினமும் ஏதாவது ஒரு விஷேசம் நடந்துகொண்டுதான் இருக்கும்.அதற்காக பக்தர்கள் அதிகாலையிலேயே கோவிலுக்கு வருவார்கள்.
இப்போது மார்கழி மாதம் என்பதால் இன்னும் கொஞ்சம் சீக்கிரமாகவே கோவில் நடை திறந்துவிடுகிறாகள்.அதிகாலையிலேயே பக்தர்கள் கோவிலுக்கு வந்துவிடுகிறார்கள்.அதைப்போலத்தான் நேற்றும் பக்தர்கள் வந்தார்கள். ஓம் என்ற பக்தி நாதம் ஒலிக்கும் என எதிர்பார்த்து வந்தவர்களுக்கு ‘திரும்பிப்போ திரும்பிப்போ.. நித்தியானந்தனே திரும்பிப்போ’ என்ற கோஷங்களின் சத்தம் சற்று அதிர்ச்சியாகத்தான் இருந்திருக்கும்.
பாலியல் குற்றவாளியான பிறகு...காவிவேஷம் கலைந்த பிறகு...முதன்முறையாக பிறந்தநாளை கொண்டாட..(இதுக்கு பேரு அவதாரப் பெருவிழாவாம்) நித்தியானந்தன் இன்று திருவண்ணாமலைக்கு வந்தான்.அவனுக்கு எதிர்ர்ர்ர்ப்ப்ப்பு தெரிவிக்க திரண்டவர்கள் போட்ட முழக்கம்தான் அது.சரச சாமியாருக்கு சத்சங்கம் எதுக்குடா..என அதிகாலை 4 மணிக்கே அம்மணியம்மன் கோபுரத்தின் அருகே கருப்புக்கொடிகளுடன் முற்போக்கு எழுத்தாளர் கலைஞர்கள் சங்கம்,ஜனநாயக வாலிபர் சங்கம், மாதர் சங்கம் ஆகிய அமைப்புகளை சேர்ந்த தோழர்கள் திரண்டனர்.கூட்டம் குறைவுதான்..ஆனால் அந்த அதிகாலை நேரத்திலும் 60க்கும் மேற்பட்ட தோழர்கள் திரண்டது ஆச்சரியமாய் இருந்தது.அதில் சில பெண் தோழர்களும் ஆர்வமாய் கலந்து கொண்டது நம்பிக்கையளித்தது.
கருப்புக்கொடிகளுடன் காத்திருக்கும் செய்தியறிந்துகொண்ட நித்தி..தனது பாதையை மாற்றிக்கொண்டு ராஜகோபுரம் வழியாக உள்ளே நுழைந்தான்.உடனே ராஜகோபுரத்தருகே திரண்டது நமதுபடை.ரொம்ப நேரம் ஆனது. நித்தி வெளியே வரவேயில்லை.போராட்டக்காரர்கள் போனால்தான் வெளியே வருவேன் என கோவிலுக்குள்ளேயே தஞ்சமடைந்துவிட்டான்.போலிசும் போதும்..விட்டுடுங்க.என கேட்டார்கள். நாமும் சரியென போக்குகாட்டிவிட்டு நித்தி வெளியே வரட்டுமெனக் காத்திருந்தோம்.
நாம் கலைந்துபோய்விட்டதாக போலீஸ் சொல்லியும் நம்பாத நித்தி, தனது ஆட்களை அனுப்பி உறுதி செய்துகொண்டபின்தான் கோவிலைவிட்டு திருமஞ்சன கோபுரம் வழியாக வெளியே வந்தான். செங்கம் சாலை சந்திப்பில் காத்திருந்த நமது தோழர்கள் அவனது பொலீரோ கார் வந்தபோது குறுக்கே பாய்ந்து கருப்புக்கொடியை காட்டி ஆர்பாட்டம் செய்தனர். அரண்டு போன நித்தி சினிமாவில் வருவது போல சர்ர்ர்.. என காரைத் திருப்பிக்கொண்டு தப்பியோடினான்.
வழ்க்கமாக இது போன்ற போராட்டங்கள் என்றால் மக்கள் பார்வையாளர்களாக ஒதுங்கி நின்று வேடிக்கைதான் பார்ப்பார்கள். ஆனால் இந்தப்போராட்டத்தின்போது அவர்களும் சேர்ந்துகொண்டனர்.
கொட்டிய மார்கழி பனிக்கு போட்டியாக..திசைகளில் முட்டிய முழக்கங்களுடந்தான் அன்றைய பொழுது விடிந்தது திருவண்ணாமலைக்கு.
தோழர்களே!
ReplyDeleteஇந்தப் போராட்டம், ஒரு செய்தியாகவே வந்திருக்கிறது. இதை முன்னிறுத்தி இன்னும் அடர்த்தியாக விஷயங்களைச் சொல்லியிருக்கலாமே.
நித்தியானந்தா ஒரு பாலியல் குற்றவாளி என்னும் சொற்றொடர் சரியானதுதானா? சமூகத்தில் சாமியார்கள் என்றால், ‘எல்லாம் துறந்த நிலை’ யென நிலைநிறுத்தப்பட்டு இருக்கும் பிம்பங்களைச் சிதைத்த ஒரு போலி. அவனை அம்பலப்படுத்தும்போதே, இப்படி நிறுவனமாக்கப்பட்ட சாமிகளின் மீதான பார்வைகளையும் சொல்லியிருக்க வேண்டும்.
தோழர்கள் வெளியே அவனுக்கு எதிர்ப்பு தெரிவிக்கும்போது, அவனுக்கு கோவிலுக்குள் செல்ல எந்தத் தடையும், அங்குள்ள சாமியோ, நிர்வாகமோ விதிக்கவில்லை. அதையும் குறிப்பிட்டு இருக்க வேண்டும்.
கெட்டிப்படுத்தப்பட்டு இருக்கும் பொதுப்புத்திகளில் சிறு உடைப்பைச் செய்ய இந்த நிகழ்வுகளை மையப்படுத்த வேண்டும்.
சன் டிவியும், தினகரனும் நித்யானந்தாவை அம்பலப்படுத்துவதற்கும், நாம் அம்பலப்படுத்துவதற்கும் வித்தியாசம் உண்டுதானே?