மெகா ஊழல்களை எதிர்த்து வாலிபர்கள் போர்க்கோலம்! பல்வேறு இடங்களில் போலீஸ் கொடூரத்தாக்குதல்!!

ஸ்பெக்ட்ரம், காமன்வெல்த், ஆதர்ஷ் குடியிருப்பு, கர்நாடக நில ஊழல் என காங்கிரஸ் - திமுக -பாஜகவின் வரலாறு காணாத ஊழல்களை எதிர்த்து டிசம்பர் 16 வியாழனன்று தமிழகம் முழுவதும் பல்லாயிரக்கணக்கான இளைஞர்கள் மறியல் களம் கண்டனர். இந்திய ஜனநாயக வாலிபர் சங்கத்தின் அறைகூவல்படி டிசம்பர் 16 அன்று தமிழக முழுவதும் 79 மையங்களில் பல்லாயிரக்கணக்கானோர் பங்கேற்ற இந்த மறியல் போராட்டம் நடைபெற்றது.


ஸ்பெக்ட்ரம், காமன்வெல்த் உள்ளிட்ட ஊழல்களில் தொடர் புடையவர்கள் மீது கிரிமினல் நடவடிக்கை எடுக்கவேண்டும், மத்திய- மாநில அரசுகளில் காலியாக உள்ள 10 லட்சம் பணியிடங் களை நிரப்ப வேண்டும், தற்போதைய மக்கள் தொகைக்கேற்ப புதிதாக அரசுப் பணியிடங்களை உருவாக்க வேண்டும், கோவிந்த ராஜன் குழு பரிந்துரைத்த கட்டணத்தைவிட அதிகமாக வசூலிக்கும் பள்ளிகளை அரசே ஏற்று நடத்த வேண்டும், சேதுக் கால்வாய் திட்டத்தை விரைந்து செயல்படுத்த வேண்டும், தமிழகத்தில் கிடைக்கும் கனிம வளத்தை பயன்படுத்தி பொதுத்துறை நிறுவனங்களை துவங்க வேண்டும், அனைத்து பஞ்சாயத்துகளிலும் ஆரம்ப சுகாதார மையத்தை தரம் உயர்த்த வேண்டும், வட்டார, மாவட்ட தலைநகரங்களில் பல்நோக்கு சிறப்பு மருத்துவ மனைகளை உருவாக்க வேண்டும்; அனைத்து மக்களுக்கும் சுகாதாரமான குடிநீர் மற்றும் கழிவறை வசதிகளை உருவாக்கி பராமரிக்கவேண்டும் என்பன உள்ளிட்ட கோரிக்கைகைள வலியுறுத்தி இந்த மறியல் போராட்டம் நடைபெற்றது.



சென்னையில் மாவட்ட ஆட்சியர் அலுவலகம் அருகே நடைபெற்ற மறியலுக்கு மாநிலச் செயலாளர் ஆர்.வேல்முருகன் தலைமை தாங்கினார். 400பேர் கலந்து கொண்டனர். தென்சென்னை மாவட்டக்குழு சார்பில் சைதாப்பேட்டை பனகல் மாளிகை எதிரில் நடைபெற்ற மறியலுக்கு மாநில துணைச் செயலாளர் ச.லெனின் தலைமை தாங்கினார். 350 பேர் கலந்து கொண்டனர். விழுப்புரத்தில் கோவையில் நெல்லையில், மதுரையில் அந்தந்த மாவட்டங் களில் மாவட்டத்தலைவர்கள் தலைமையில் மறியல் நடைபெற்றது.

தமிழகம் முழுவதும் மாவட்ட, தாலுகா தலைநகரங்களில் நடைபெற்ற இப்போராட்டத்தில் பல்லாயிரக்கணக்கான இளைஞர்கள் கலந்து கொண்டு கோரிக்கைகளை முழங்கினர். அமைதியான முறையில் மறியலில் ஈடுபட்ட வாலிபர்களை பல்வேறு போலீசார் கடுமையாக தாக்கினர். இதில் வாலிபர் சங்க ஊழியர்கள் படுகாயம் அடைந்துள்ளனர்.

குறிப்பாக திண்டுக்கல் மாவட்டம் பழனியில் மாநிலத் துணைச் செயலாளர் பிரபாகரன் தலைமையில் நடைபெற்ற மறியலில் போலீசார் நடத்திய கொடூரத்தாக்குதலில் 4 பேர் படுகாயம் அடைந்தனர். பிரபாகரனுக்கு கை மற்றும் தோள்பட்டையிலும், பழனி பகுதி துணைத்தலைவர் வடிவேலுக்கு கண்ணிலும், நிர்வாகிகள் மாரிக்கு முதுகிலும், மோகனுக்கும் காதிலும் காயம் ஏற்பட்டுள்ளது.

போலீசாரின் இந்த காட்டுமிராண்டித்தனத்திற்கு வாலிபர் சங்க மாநிலக்குழு கண்டனம் தெரிவித்துள்ளது. தாக்குதலை கண்டித்து மாநிலம் முழுவதும் கண்டனக்குரல் எழுப்பவும், அடக்குமுறைகளை எதிர்த்து தொடர்ந்து போராடவும் உறுதி பூண்டுள்ளது.