திசை திருப்ப வேண்டாம் திராவிடக் கழக தலைவரே!

“ஆ.இராசாமீது குற்றம்சாற்றிட எந்த இடத்திலும் ஆதாரமில்லை”
“பார்ப்பன உயர்ஜாதி ஊடகக் கூட்டம் திட்டமிட்டு சதிவலை”
“மீண்டும் கலைஞர் ஆட்சி வந்துவிடக் கூடாது என்பதே நோக்கம்”
“தமிழர்களே, விழிப்பாக இருந்து கலைஞர் ஆட்சியை மீண்டும் மலரச் செய்வீர்!”

இப்படியான முழக்கங்களோடு கரடி விட ஆரம்பித்திருக்கிறார் திராவிடக் கழகத்தின் தலைவர் வீரமணி அவர்கள். நாடே கதிகலங்கும் ஊழல் நடந்திருக்கிறது. அதற்கு ஆதாரங்கள் அறிக்கைகளாகவும், டெலிபோன் உரையாடல்களாகவும் வெளிவந்துகொண்டு இருக்கின்றன. ஆனால் ஐயாவின் பார்வையில் அவையெல்லாமே ஜோடிக்கப்பட்டவைகளாகத் தெரிகிறது. எல்லாம் அமபலமாகிப் போன ஊழலில் இப்போது தலித், தமிழன், திராவிடன் என்னும் கவசங்களை அணிந்துகொண்டு ஐயா வீரமணி அவர்கள் வீறுகொண்டு புறப்பட்டு இருக்கிறார்.

அதிகாரத்தின் வளைவுக்குள் தலித்துக்களை எளிதில் நுழையவிடாது, இருக்கவும் விடாது சாதீய இறுக்கம் நிறைந்த இந்த அமைப்பு என்பதில் உண்மை உண்டு. மைய அரசின் ஆட்சியதிகாரத்தில் தெற்கிலிருந்து வருகிறவர்களுக்கு முக்கிய இடம் கொடுப்பதில் வட பகுதியினருக்கு விருப்பமிருப்பதில்லை என்பதற்கும் வரலாறு உண்டு. ஆனால் எப்போதும் இல்லாத அளவுக்கு தமிழகத்துக்கு (கலைஞரின் குடும்பத்திற்கு) ஏகப்பட்ட அமைச்சர் பதவிகளைப் பெற முடிந்தபோது, இதுபோன்ற வார்த்தைகளையெல்லாம் மூட்டைகட்டி பரண்மேல் வைத்துவிட்டு, கலைஞரின் சாதனை என்று மார்தட்டிக்கொண்டு இருந்தார் இதே ஐயா வீரமணி அவர்கள். இப்போது பிரச்சினையென்று வந்தவுடன், பழைய வார்த்தைகளையெல்லாம் தூசிதட்டி உபயோகிக்க ஆரம்பித்திருக்கிறார்.

ஆ,ராசா ஒரு பகடைக்காயாகவே இருக்கலாம். ஆனால் யாருக்கு இருந்திருக்கிறார் என்பதுதான் கேள்வி. அவர் மீதான அபாண்டமாக குற்றச்சாட்டில் ‘பார்ப்பனீயச் சதி’ இருக்கிறதென்றால், அவரது முறைகேடுகளால் பலன் பெற்றவர்கள் யாராம்? அதிகராத்தில் தானும் ஒரு புள்ளியாய் மாறிய ராசா யாருக்கு விசுவாசமாய் இருந்திருக்கிறார், யாருக்கு துரோகம் செய்திருக்கிறார் என்பதை ஆராயத் தலைப்பட்டால், தெளிவானச் சிந்தனை எனலாம். பீடங்களில் இருப்பவர்கள் ஆணாய் இருந்தாலும், பெண்ணாய் இருந்தாலும், பார்ப்பனராய் இருந்தாலும், தலித்தாய் இருந்தாலும் அவர்கள் தங்கள் சுயங்களைத் தொலைத்து, சுயநலம் கொண்டவராகவே மாறிப்போகின்றனர். மக்களையும், தேசத்தையும் சுரண்டுகிறவர்களாக உருமாறிப் போகின்றனர். இது ஏன் நிகழ்கிறது என அறிய முற்பட்டால், நேர்மையான கண்ணோட்டம் எனலாம்.

நாடாளுமன்றத்தில் மத்திய தணிக்கை அதிகாரியின் அறிக்கை தாக்கல் செய்வதற்கு முன்னரே எப்படி ஊடகங்களுக்கு போனது என்னும் மாபெரும் அறிவுபூர்வமான கேள்விகளையும் முன்வைத்திருக்கிறார் ஐயா வீரமணி அவர்கள். இதற்கு முன் எப்போதுமே இப்படி வெளியாகவில்லையோ? அதிகாரத்திற்கான போட்டிகளில், அரசியல்வாதிகளும், ஊடக முதலாளிகளும் சேர்ந்து அவ்வப்போது இப்படிக் காரியங்களைச் செய்யவில்லையா? ஃபோர்பர்ஸ் ஊழலில் ஊடகங்கள் வெளியிட்ட செய்திகளில் எந்த தலித்துக்கு எதிரான பார்ப்பனீயச் சதி இருந்ததாம். இது வேறு அரசியல் ஐயா.

நாட்டின் மிகப்பெரும் ஊழலில், ஆள்பவர்களின் சகல மோசடி வேலைகளும், லஞசத்தில் ஊறித் திளைக்கிற அதிகார வர்க்கமும் அமபலப்பட்டு நிற்கின்றன. ஆ.ராசாவை மட்டுமே முன்னிலைப்படுத்தி விஷயத்தைப் பார்க்காமல், இந்த அமைப்பின் கோணல்களையும், குளறுபடிகளையும் பேச வேண்டிய வேளை இது. ஐயா வீரமணியோ, ராசாவை முன்னிலைப்படுத்தி முழு பூசணிக்காயை சேற்றுக்குள் மறைக்கப் பார்க்கிறார். மொத்த விஷயத்தையும் திசை திருப்பப் பார்க்கிறார்.

சந்தடி சாக்கில் அப்படியே ‘தமிழகத்தில் கலைஞர் ஆட்சி சிறப்பாக நடைபெறுகிறது’ எனவும் அதைக் கவிழ்க்க சதி எனவும் வேறு அளந்து விடுகிறார் ஐயா வீரமணி. மனு தர்மத்திற்கும், மனித தர்மத்திற்கும் நடக்கும் போர் என முரசறைகிறார். சில இலவசத் திட்டங்களை அறிவித்ததன் மூலம், கலைஞரின் ஆட்சி பொன்னான ஆட்சியாகிவிடுமா?  தேர்தலின் போது அறிவித்த இரண்டு ஏக்கர் நிலத்தை நிலமற்றவர்களுக்கு வினியோகம் செய்து விட்டாரா? அவரது குடுமபமே இப்போது தமிழக அரசியலையும், சினிமாவையும் ஏகபோகமாக ஆட்டுவிப்பது கண்ணுக்குத் தெரியவில்லையா? சத்துணவு ஊழியர்களிலிருந்து நெய்வேலித் தொழிலாளர்களின் போராட்டங்களென தொடர்ந்து  தமிழகம் முழுவதும் அரசுக்கெதிரான குரல்கள் எழும்புவது கூட பார்ப்பனீயச் சதியா? அந்நியக் கம்பெனிகளுக்கு ஆதரவாய் சொந்த மக்களையே காவல்துறையால் குதறுவது எந்த மனித தர்மமோ? பெரியாரின் கொள்கை வழிவந்தவரின் பேச்சும், செயலும் இப்படியாகிப் போனதில் நாம்தான் வருந்த வேண்டும் போலிருக்கிறது. பார்ப்பனீயத்தை எதிர்க்கிறோம் என்று புறப்பட்டவருக்கு, பார்ப்பனீயத்தின் இத்தகைய குணாம்சங்கள் பீடித்திருப்பது கண்டு நாம்தான் அவமானப்பட வேண்டும் போலிருக்கிறது.

தலித்துக்கள் என்று இப்போது வரிந்து கட்டிக்கொண்டு வருகிற ஐயா வீரமணி அவர்களுக்கு இரண்டு நாட்களுக்கு முந்தைய செய்தி ஒன்றை சொல்ல வேண்டியிருக்கிறது. நாகர்கோவில் மாவட்டத்தில் தாழக்குடி பஞ்சாயத்து துணைத்தலைவரான தங்கசாமி தலித் சமூகத்தைச் சார்ந்தவர். தலித்துகளுக்கான வார்டில் போட்டியிட்டு வெற்றி பெற்றவர். பின்னர் அப்பஞ்சாயத்தின் துணைத்தலைவராகவும் வெற்றி பெற்றார். அவரது குழந்தைகளுக்காக தலித் சமூகத்தைச் சார்ந்தவர் என்ற சான்று கேட்டு பல மாதங்களுக்கு முன்னர் வட்டாட்சியரிடம் விண்ணப்பித்திருந்தார்.  அதிகாரிகள் சான்று வழங்காமல் பல்வேறு பொய் காரணங்கள் கூறி இழுத்தடித்துள்ளனர். இந்நிலையில், மக்கள் பிரதிநிதியான எனக்கே நியாயமாக சான்று கிடைக்கவில்லையென்றால் வாழ்ந்து என்ன பயன் என நினைத்து விஷத்தை குடித்துள்ளார். அங்கிருந்த மக்கள் அவரை பூதப்பாண்டி மருத்துவமனைக்கு கொண்டு சென்றனர். ஆனால், சிகிச்சை பலனின்றி மதியம் இறந்தார். (தமிழக அர்சின்!) காவல்துறையோ அவர் தற்கொலை செய்துகொண்டதாக வழக்கு பதிவு செய்துள்ளது. ஆனால், அதற்கு காரணமான அதிகாரிகள் மீது வன்கொடுமை தடுப்புச்சட்டத்தின் கீழ் வழக்கு பதிவு செய்ய மறுத்தது.

ஐயா வீரமணி அவர்கள் குரல் எழுப்ப வேண்டியது தங்கசாமிகளுக்காக. ஆ.ராசாக்களுக்காக அல்ல.