எப்போது நடக்கும் ஏகலைவன் கட்டைவிரல் சிகிச்சை?

பட்ஜெட் சடங்குகளை மீண்டுமொரு முறை பிரணாப் முகர்ஜி செய்து முடித்துள்ளார். பட்ஜெட் உரைகளை நிகழ்த்தியதில் சாதனையை நோக்கி அவர் முன்னேறிக் கொண்டிருக்கிறார். ஆனால் வழக்கம்போல அளித்த வாக்குறுதிகளைக் கண்டுகொள்ளாமல் விடுவதிலும் தெளிவாக இருந்து வருகிறார். பட்டியலின மற்றும் பழங்குடி மக்களுக்கான துணைத்திட்டத்திற்கான ஒதுக்கீட்டில் கை வைத்திருக்கிறார். இவர்களின் வருங்கால அரசியல் ராகுல்காந்தியோ, பட்டியலின மக்களின் வீடுகளுக்குள் புகுந்து, இருப்பதையும் காலி செய்து, தட்டைக் கவிழ்த்து வைத்துவிட்டுக் கிளம்பி விடுகிறார்.

அதுவோ ஒருநாள்பாடு. ஒட்டுமொத்த வாழ்க்கையையே கேள்விக்குறியாக்கும் பட்ஜெட்டை நிதியமைச்சர் பிரணாப் முகர்ஜி செய்து கொண்டிருக்கிறார்.

அண்மையில் பிரணாப் முகர்ஜி வாசித்த பட்ஜெட்டில் பட்டியலின மற்றும் பழங்குடி மக்களுக்கான துணைத்திட்டம் இடம் பெற்றிருக்கிறது. தனியாக ஒதுக்கீடு என்பது வெற்றிதான் என்றாலும், மக்கள் தொகைக்கேற்ற ஒதுக்கீடு மற்றும் அந்த நிதி முறையாக ஒதுக்கப்பட்டு செலவிடப்படுதல் ஆகியவையே பிரதானமான அம்சங்களாகும்.

இரண்டு பிரிவினரையும் சேர்த்தால் ஒட்டுமொத்த மக்கள் தொகையில் 24.4 விழுக்காடாக இருக்கும், திட்டமிட்ட மற்றும் திட்டமிடப்படாத பட்ஜெட் முன்மொழிவுகளில் துணைத்திட்டத்திற்காக ஒதுக்கப்பட்ட தொகையோ பட்ஜெட் தொகையில் வெறும் 4.03 விழுக்காடாகவே இருக்கிறது. ஒதுக்கப்பட வேண்டிய நிதி மற்றும் ஒதுக்கப்பட்டுள்ள நிதி ஆகிய இரண்டையும் ஒப்பிட்டால் பெரும் இடைவெளி இருப்பதைக் காண முடிகிறது.

துணைத்திட்டத்தின் கீழ் பட்டியலின மக்களுக்காக 30 ஆயிரத்து 551 கோடி ரூபாய் தற்போது ஒதுக்கப்பட்டிருக்கிறது. இது ஒட்டுமொத்த திட்டத்தில் 8.98 விழுக்காடாகும். மக்கள் தொகையின் அடிப்படையில் பார்த்தால் 24 ஆயிரத்து 570 கோடி ரூபாய் கூடுதலாக ஒதுக்கப்பட்டிருக்க வேண்டும். கிட்டத்தட்ட இதேநிலைதான் பழங்குடி மக்களுக்கான துணைத்திட்ட ஒதுக்கீட்டிலும் நடந்துள்ளது. பழங்குடியினருக்கான துணைத்திட்டத்தில் 17 ஆயிரத்து 371 கோடி ரூபாய் ஒதுக்கப்பட்டிருக்கிறது. ஒட்டுமொத்த ஒதுக்கீட்டில் இது 5.11 விழுக்காடாகும். கூடுதலாக 10 ஆயிரத்து 530 கோடி ரூபாய் ஒதுக்கப்பட்டிருக்க வேண்டும். கடந்த ஆண்டோடு ஒப்பிடும்போது துணைத்திட்ட நிதிஒதுக்கீடு அதிகம்தான் என்றாலும் இருக்கும் பிரச்சனைகளோடு ஒப்பிட்டால், கூடுதல் நிதி ஒதுக்கப்பட வேண்டிய அவசியம் தெரிகிறது.

இவ்வாறு துணைத்திட்டத்திற்கான நிதி ஒதுக்கீடு குறைவதற்கு பல துறைகள் நிதி ஒதுக்காமல் விட்டுவிடுவதுதான் காரணமாக இருக்கிறது. பட்டியலின மக்களுக்கான துணைத்திட்டத்திற்கு 24 துறைகளும், பழங்குடி மக்களுக்கான துணைத்திட்டத்திற்கு 26 துறைகளும் மட்டுமே நிதி ஒதுக்கியுள்ளன. வளர்ச்சியடைந்து வரும்துறைகள்என்று கருதப்படுபவையே நிதிஒதுக்காமல் இருக்கின்றன. நிலக்கரி,சாலைப்போக்குவரத்து, நெடுஞ்சாலைத்துறை, மின்துறை, விண்வெளி ஆய்வு, விமானப் போக்குவரத்து, உள்துறை, பெட்ரோலியம் ஆகிய துறைகள்தான் நிதி ஒதுக்காமல் இருக்கின்றன. பொறுப்பேற்றதிலிருந்து தனது அமைச்சக வேலைகளை அலட்சியம் செய்து வரும் மம்தா பானர்ஜியின் ரயில்வேயும் இந்தப்பட்டியலில் இடம் பெறுகிறது. இருக்கும்காலிப் பணியிடங்களை ரயில்வே நிரப்பினாலே ஆயிரக்கணக்கான பட்டியலின மற்றும் பழங்குடி மக்களுக்கு வேலை கிடைக்கும் வாய்ப்பிருக்கிறது.

ஒதுக்கப்படும் நிதி ஒழுங்காகப் போய்ச் சேராது என்பது ஒருபுறம். மறுபுறத்தில், ஒதுக்கீடே இல்லாமல், சமூகத்தில் ஒடுக்கப்பட்டுள்ள மக்களுக்கு நியாயமாகப் போய்ச்சேர வேண்டிய நிதி கொள்ளையடிக்கப்படுகிறது.

இதனால்தான் சர்வதேச அளவில் மனிதவள மேம்பாடு குறித்து எடுக்கப்படும் ஆய்வுகளில் இந்தியா மிகவும் பின்தங்கியிருக்கிறது என்ற விபரம் அம்பலமாகிவிடுகிறது. பட்டியலில் இடம் பெற்றுள்ள 169 நாடுகளில் இந்தியா 119வது இடத்தில் இருக்கிறது. இலங்கை இந்தியாவைவிட நல்ல இடத்தில் இருக்கிறது. பட்டியலின மற்றும் பழங்குடி மக்களின் குறைகளைக் களையாமல் எப்படி இந்தப் பட்டியலில் முன்னேறப் போகிறோம் என்கிறார்கள் சமூக ஆர்வலர்கள்.