சல்மான் தசீர்: மத அடிப்படைவாதத்திற்கு அடிபணிய மறுத்த தீரர்!

இந்த செவ்வாய்க் கிழமையன்று, தமது சொந்தக் காவலாளியாலேயே சுட்டுக் கொல்லப்பட்டு இருக்கிறார் பாகிஸ்தானின் பஞ்சாப் மாநில ஆளுநர் சல்மான் தசீர். இஸ்லாமியப் பழமைவாத வெறிச் செயலுக்கு அடி பணிய மறுத்த தீரர் அவர் என்பது முக்கியமானது. தாம் எந்த மிரட்டுதலான சூழலில் இப்படி ஒரு மதச் சார்பற்ற தன்மையில்  இயங்கிக் கொண்டிருக்கிறோம் என்ற தெளிவோடிருந்த ஒருவரைத் தான் பலி கொண்டிருக்கிறது பாகிஸ்தான் இஸ்லாமிய தீவிரவாதம்.

ஆசியா பிபி என்ற மரண தண்டனை விதிக்கப்படிருக்கும் சிறுபான்மை கிறித்துவ மத நம்பிக்கை கொண்டிருக்கும் பெண்மணிக்கு ஆதரவாகக் குரல் கொடுத்தார் தசீர். அந்தப் பெண் சிறைவைக்கப்பட்டிருந்த இடத்திற்கே நேரில் சென்று அவர் அருகிலேயே நின்று பத்திரிகைகளுக்கு பேட்டியும் கொடுத்தார்.  பாகிஸ்தான் மத நிந்தனைச் சட்டம் (Blasphemy Law) மிகக் கடுமையாக இருக்கிறது, அதைத் திருத்தி அமைக்க வேண்டும், ஆசியா பிபி விடுதலை செய்யப்பட வேண்டும் என்று பகிரங்கமாகப் பேசினார். வெறி கொண்டெழுந்த அடிப்படைவாதக் கும்பல் தம்மை பலி கேட்டு கறுவிக் கொண்டிருக்கிறது என்று அறிந்தே, இணையதளத்தில் (டுவீட்டர்) தாம் மத வெறியர்களின் மிரட்டலுக்கு அஞ்சுவதாக இல்லை என்று பதிவு செய்தார்.  மனிதகுல விரோதிகள் அவரை உடனே பழிவாங்கிவிட்டிருக்கின்றனர்.

ஆசியா பி பி மீது பாகிஸ்தான் மத துவேஷ சட்டத்தின் 295-C சரத்தின் அடிப்படையில் குற்றம் சாட்டப்பட்டிருந்தது. நபிகள் நாயகம் குறித்து நேரடியாகவோ, மறைமுகமாகவோ இழிவாகப்  பேசினாலோ, ஜாடை செய்தாலோ, எந்த விதத்தில் கீழ்த்தரமாக அப்படிப் பொருள்படும்படி நடந்து கொண்டாலோ நடவடிக்கைக்கு உள்ளாக்கப்படும் இந்தக் குற்றம் நிரூபிக்கப் பட்டால் மரண தண்டனை வரை வழங்க நீதிமன்றத்திற்கு அதிகாரம் அளிக்கும் கடுமையான சட்டப் பிரிவு அது.

இஸ்லாமிய மத அடிப்படையிலான நாடுகளுள், பாகிஸ்தான் நாட்டின் மத நிந்தனைச் சட்டம் தான் மிகக் கடுமையானது என்று நிபுணர்கள் தெரிவிக்கின்றனர்.  ஜியா உல் ஹக் காலத்தில் 1986ல் அறிமுகப்படுத்தப்பட்ட பிறகு மேற்படி சட்டப்படி இதுவரை யாரும் மரண தண்டனைக்கு உட்படுத்தப் படவில்லை என்றாலும்,   அப்படியான குற்றம் சாட்டப்பட்டிருந்தவர்கள் (இதில் இஸ்லாமியர் அதிகம்) 34 பேர் காவல் துறையின் 'நேரடி பார்வையில்' பகிரங்கமாக கொல்லப்பட்டனர் அல்லது தற்கொலை (?) செய்து கொண்டனர் என்கிறது ஹிந்துவில் ஜனவரி ஒன்றாம் தேதி வந்திருந்த அனிதா ஜோஷுவா அவர்களின் கட்டுரைக் குறிப்பு.

ஆசியா பி பி இழைத்த குற்றம் என்ன....2009 ம் ஆண்டில் தண்ணீர் எடுத்துவரப் போன இடத்தில் அவரது கிராமத்தில் இஸ்லாமிய பெண்கள் அவரைத் தண்ணீரில் கை வைக்காதே என்று கொச்சையாகப் பேசி தடுத்ததில் வாக்குவாதம் ஏர்பட்டிருக்கிறது. ஒரு கட்டத்தில், அவர் மகம்மது நபி பற்றி ஏதோ இழிவான சொல்லை உச்சரித்தார் என்றூ குற்றம் சுமத்தினர்.  பிறகு அவரது வீட்டைத் தேடி  ஆட்கள் திரண்டு வந்து அவரை அடித்து நொறுக்கும்போது காவல்துறை தலையிட்டுத் தடுத்துவிட்டு, பின்னர் அவர் மீதே வழக்கு பதிவு செய்து சிறையில் அடைத்துவிட்டது.  இந்த ஆண்டு நவம்பர் மாத முற்பகுதியில், நான்கானா சாகிப் மாவட்ட நீதிமன்றம் அவருக்கு மரண தண்டனை என்று தீர்ப்பளித்தது.

பாகிஸ்தானில் 96% மக்கள் இஸ்லாமியர்.  கிறித்துவர்கள் 1.6 % வசிக்கின்றனர்.  சிறுபான்மை கிறித்துவ சமூகத்திற்கு எதிராகவும், பொதுவாகவே மதச் சார்பின்மைக்கு எதிராகவும் பழமைவாத வெறிச்செயல்கள் பாகிஸ்தானில் தொடர்ந்து நடந்து வருகின்றன.  இஸ்லாமிய சமூகத்தைச் சார்ந்த பெரும்பகுதி மக்கள் உள்ளபடியே மத தீவிரவாதத்தை ஏற்றூக்கொண்டவர்கள் இல்லை.  ஜனநாயகத் தேர்தல் எதிலும் எந்தத் தீவிரவாத அமைப்புக்கும் மக்கள் ஆதரவு அளித்துவிடவில்லை. என்றாலும், வீதிகளில் திரியும் முரட்டு வெறியர்களின் அடாத செயல்களை பெரும்பான்மை மக்கள் தட்டிக் கேட்கும் சூழலும் இல்லை என்பதே உண்மை. இது அடிப்படைவாதிகளின் துணிச்சலைக் கூட்டுகிறது.  மத அடிப்படைவாதிகள் விடுக்கும் கட்டளைகளை செயல்படுத்தும் பயங்கரவாதச் செயல்கள் இதனாலேயே அரங்கேறுகின்றன.

மத நிந்தனைச் சட்டத்தின் முன் குற்றம் சாட்டப்பட்டவர்கள் மட்டுமல்ல, அவர்களுக்கு ஆதரவுக் குரல் கொடுக்க முனைவோரையும் வஞ்சம் தீர்க்கின்றனர் மதவெறியர்கள்.  இதே சட்டப் பிரிவின் அடிப்படையில் கீழவை நீதி மன்றத்தால் மரண தண்டனை விதிக்கப் பட்டிருந்த இரண்டு கிறித்துவ சிறுவர்களை விடுதலை செய்தார் என்பதற்காக லாகூர் உயர் நீதி மன்ற நீதிபதி ஆரிஃப் இக்பால் பட்டி 1997ல் படுகொலை செய்யப்பட்டார்.

ஆசியா பி பி வழக்கின் தீர்ப்புக்கு எதிராக இஸ்லாமிய மதத்தைச் சார்ந்தவர்களே பலரும் திரண்டு அவரை விடுதலை செய்யவும், மத நிந்தனைச் சட்டத்தின் விஷப் பல்லைப் பிடுங்கவும் பெருந்திறல் ஆர்ப்பாட்டங்கள் நடத்தினர்.  குடியரசுத் தலைவர் சர்தாரி சட்டத்தைத் திருத்த நிபுணர் குழு அமைக்க விருப்பம் தெரிவித்தார்.  ஏற்கெனவே ஆளும் பாகிஸ்தான் மக்கள் கட்சியின் தலைவர் ரெஹ்மான் பல ஆண்டுகளுக்கு முன்பே முன்மொழிந்திருந்த திருத்தங்களை அமல்படுத்த அடுத்தடுத்த ஆட்சிகள் எவற்றுக்கும் துணிவில்லாது போயிருக்கிறது.  ஆசியா பி பி வழக்கு தான் முதல் மரண தண்டனை அறிவிப்பு என்பதும், அதுவும் பெண்ணுக்கு எதிரானது என்பதும் இந்தச் சட்டத்தை விவாதப் பொருள் ஆக்கியிருந்தது. அமைச்சர் ஒருவர் கடந்த வாரம் திருத்தங்கள் எதுவும் செய்யமாட்டோம் என்று சொன்னது தீவிரவாத சக்திகளுக்கு ஊக்கம் கொடுத்ததை மத சார்பற்ற சக்திகள் கவலையோடு சுட்டிக் காட்டிக் கொண்டிருக்கும் வேளையில், தசீர் படுகொலை அவர்களது அச்சத்தை மெய்ப்பித்து விட்டது.

ஏழைக் குடும்பத்தைச் சார்ந்த ஆசியா பிபி, கதிகலங்கிப் போய் தம்மைக் கைவிட்டுப் போன கணவர் மற்றும் குழந்தைகளைப் பிரிந்த நிலையில் மிகச் சாதாரண வாக்குவாதம் ஒன்றில் ஒரு சார்பான புகாரின் மீது, மிகக் கடுமையான சட்டத்தால் மரணத்தின் விளிம்பிற்குக் கொண்டு வந்து நிறுத்தப் பட்டிருக்கிறார். அவருக்கான குரலாக மட்டுமல்ல, ஜனநாயகத்தின் குரலாகவும் ஒலித்த ஒருவரை தான் பாகிஸ்தான் மத தீவிரவாதம் பலி கொண்டிருக்கிறது.  எல்லைக்கு இந்தப் புறம் இருக்கும் இந்திய சமூகத்திற்கு இதிலிருந்து எத்தனையோ பாடங்கள் இருக்கின்றன. வலுவெடுத்து வளர்ந்து வரும் இந்து மத பயங்கரவாதத்தின் முகமும் இதே கோரமானது தான் என்பதற்கு குஜராத் பரிசோதனைக் கூடத்திலேயே விளக்கங்கள் நிரம்ப உண்டு. இஸ்லாமிய தீவிரவாதம் குடித்திருக்கும் உயிர், இஸ்லாமிய மத நம்பிக்கை கொண்டிருந்த ஒரு மனிதருடையதுதான்.  மதவெறிக்கு உண்மையில் மதமே பொருட்டல்ல. மனிதத் தன்மையே அற்ற அவர்களது தாக்குதலின்  இலக்கு மனிதநேயம்.

தான் தனி ஆளாக நிறுத்தப்பட்டாலும் அடிப்படைவாதத்திற்கு அடிபணிய முடியாது என்று நின்றதற்காகக்  கொலையுண்டிருக்கிறார் சல்மான் தசீர். அவருக்கு நேர்ந்த முடிவு பெரும் கண்டனத்திற்குரியது. உலகத்தின் மனசாட்சியை சலீம் தசீரின் உலுக்கிவிட்டுச் சென்றிருக்கிறார்.  மதப்பழமைவாதத்திற்கும், மதவெறிக்கும், அடிப்படைவாத குரூர இயக்கங்கள் அனைத்துக்கும் எதிரான குரல்களை எழுப்பச் சொல்கிறது அவரது மரணம். மதச்சார்பின்மைக்கான முழக்கங்களை ஓங்கி ஒலிக்க வேண்டுகிறது அவரது தியாகம். 

-எஸ்.வி.வேணுகோபாலன்