“ஏசுவைக்கூட ஒருமுறைதான் சிலுவையில் அறைந்தார்கள்”

ஜெயலலிதா பதவியேற்ற இந்த ஆறுமாத காலத்திற்குள் அவரது அரசு  செய்திருக்கும் அட்டூழியங்களின் பட்டியல் நீண்டுகொண்டே செல்கிறது.  தலைமைச் செயலக மாற்றம், சமச்சீர் கல்வியை ஓரங்கட்டியது, பரமக்குடியில் ஏழு தலித்களை சுட்டுக்கொன்றது, அண்ணா நூலக இடமாற்றம், 13500 மக்கள் நலப் பணியாளர்கள் டிஸ்மிஸ் என  இதுவரை அரங்கேறியிருக்கிறது.

ஈவிரக்கமில்லாமல் 13,500 மக்கள் நலப் பணியாளர் வீடுகளின் விளக்குகளை ஊதி அணைத்திருக்கிறார் ஜெயலலிதா. அவர் பதவிக்கு வரும்போது ஒவ்வொரு முறையும், இப்படியாக ஆயிரக் கணக்கில் அரசு ஊழியர்களை டிஸ்மிஸ் செய்யும் குரூர மனோபவம் கொண்டவராக இருக்கிறார். அந்த சாதாரண, உழைத்து வாழும் எளியவர்கள் அதிர்ச்சியடைந்து, கதறுவதைப் பார்ப்பதில் என்ன திருப்தியோ, தெரியவில்லை.

தமிழகம் முழுவதும் ஜெயலலிதாவின் இந்த அடாவடித்தனத்திற்கு கடும் எதிர்ப்பு  எழுந்திருக்கிறது.  சி.பி.எம். சி.பி.ஐ, தி.மு.க, பாட்டாளி மக்கள் கட்சி, தே.மு.தி.க என பல கட்சிகளும் ஜெயலலிதாவின் அராஜகத்தைச் சாடியிருக்கின்றனர். சி.ஐடியூ, விவசாயிகள் சங்கம், அரசு ஊழியர் சங்கங்களும் போராட்டம் நடத்தப் போவதாக அறிவித்திருக்கின்றன.

பத்திரிகையில் செய்தி பார்த்து நேற்று மக்கள் நலப் பணியாளர்கள் கொதித்து வீதிக்கு வந்து தமிழகம் முழுவதும் ஆர்ப்பாட்டம் நடத்தியிருக்கிறார்கள். ஈரோட்டில் காளியம்மாள், “வேலை போய்விட்டதே. குடும்பத்தை எப்படிக் காப்பாற்றுவேன்” எனத் தரையில் உருண்டு கதறியிருக்கிறார். திண்டுக்கல்லில் நாகலட்சுமி, “ஒவ்வொருமுறையும் எங்களை டிஸ்மிஸ் செய்து அவமானப்படுத்துகிறது அரசு. நாங்கள் மக்களுக்குத்தானே பணியாற்றினோம். எங்களைத் தூக்கில் போடுங்கள் அல்லது வீட்டுக்குள் புகுந்து குடும்பத்தோடு வெட்டிக் கொல்லுங்கள்.” எனக் கண்ணீர் வடித்திருக்கிறார்.

அமலோற்பவம் என்னும் பணியாளர், “ஏசுவைக்கூட ஒருமுறைதான் சிலுவையில் அறைந்தார்கள். எங்களை இந்த அரசு மூன்றுமுறை சிலுவையில் அறைந்து விட்டது” என்றார். மாநிலப் பொருளாளர் ரங்கராஜன், “எங்களில் அனைவரும் ஐம்பது வயதைக் கடந்து விட்டோம். இனி நாங்கள் எங்கு சென்று எந்த வேலை பார்க்க முடியும். எங்களை நம்பியுள்ள குடும்பத்தின் எதிர்காலம் கேள்விக்குறியாகி விட்டது.” என்றார்.

பாசிசத்திற்கும், அதிகாரத் திமிருக்கும் ஏழையின் கண்ணீர் ஒரு பொருட்டல்ல. சாமானியர்களின் துயரங்களையும், , வலிகளையும் அது ரசிக்கவேச் செய்யும். ஆனால் இன்னும் நான்கரை வருடங்கள் கழித்து பொறுத்திருப்போம் என்றிருக்காமல், மக்கள் வீதிகளில் இறங்கிப் போராடினால், உடனடியாகவே கணக்குத் தீர்க்க முடியும்.

மக்கள் நலப் பணியாளர்கள் டிஸ்மிஸ்: ஜெயலலிதாவின் கொடூரம்!

கையெடுத்துக் கும்பிட்டபடி, இரண்டு விரல்களை அசைத்தபடி மக்களிடம் ஒட்டுக் கேட்க வந்த ஜெயலலிதா இவர் இல்லை. கோரப்பல் முளைத்த அதிகார ரூபத்தில் காட்சியளிக்கிற  உருவம் இது. மிக்ஸி தருவேன், கிரைண்டர் தருவேன், ஆடு தருவேன், மாடு தருவேன் என அள்ளிவிட்டவர், இதோ இருந்த வேலையையும் பிடுங்கிக்கொண்டு விட்டார். அவரது வழக்கமான பாணியில் ஒரே நாளில் 13500 மக்கள் நலப்பணியாளர்கள் டிஸ்மிஸ் செய்யப்பட்டு இருக்கின்றனர்.

தமிழகத்தின் கிராமப்புற மக்களுக்கு அரசின் நலத்திட்டங்கள் குறித்த புரிந்துணர்வை உருவாக்கவும், அவற்றின் பலன்களை மக்களிடம் கொண்டு சேர்க்கவும் திமுக அரசு 2.7.1990ல் 25ஆயிரம் மக்கள் நலப் பணியாளர்களை மாதம் ரூ.200 தொகுப்பூதியத்தில் நியமனம் செய்தது.

ஆனால், 10 மாத காலமே பணி செய்த இவர்களை அடுத்து ஆட்சிக்கு வந்த அதிமுக அரசு எவ்விதக் காரணமும் இன்றி 1991 மே மாதத்தில் பணி நீக்கம் செய்தது. இதன்பிறகு மீண்டும் ஆட்சி மாற்றம் ஏற்பட்ட போது 1997ல் மாதம் ரூ.500 தொகுப்பூதியத்தில் திமுக அரசு இவர்களை பணியமர்த்தியது. பின்னர் மேலும் 200 ரூபாய் உயர்த்தி வழங்கப்பட்டது.

2001ம் ஆண்டில் அதிமுக அரசு மீண்டும் பொறுப்பேற்ற பின் மக்கள் நலப்பணியாளர்கள் பணி நீக்கம் செய்யப்பட்டனர். 2006ல் திமுக அரசு இவர்களை பணியில் அமர்த்தி மாதம் ரூ.1000 வீதம் தொகுப்பூதியம் வழங்கி ஆணையிட்டது.

மக்கள் நலப்பணியாளர்களின் சரிபாதி பேர் பெண்கள். மேலும் இவர்கள் அனைவரும் 40வயத்திற்கும் அதிகமானவர்கள். பணி நியமனம் பெற்று 2 முறை பணி நீக்கம் செய்யப்பட்ட நிலைக்கு ஆளாக்கப்பட்டவர்கள் இவர்களைத் தவிர வேறு எவரும் இருக்க முடியாது. இந்த வேலையை நம்பி இவர்கள் இருந்து விட்டதால் வேலைவாய்ப்பக பதிவு மூப்பும் கலாவதியாகி விட்டது. அரசுப் பணிகளுக்கான வயது வரம்பும் கடந்து வேறு எந்த வேலைக்கும் செல்ல முடியாத நிலைக்கும் ஆட்படுத்தப்பட்டுள்ளனர்.

தமிழக அரசின் இந்த நடவடிக்கைக்கு தமிழ்நாடு அரசு ஊழியர் சங்கம் கண்டனம் தெரிவித்துள்ளது. இந்த அரசாணையை உடனடியாக ரத்து செய்ய வேண்டும் என்று சங்கத்தின் தலைவர் இரா.தமிழ்ச்செல்வி, பொதுச்செயலாளர் இரா.சீனிவாசன் ஆகியோர் வெளியிட்ட அறிக்கையில் கேட்டுக் கொண்டுள்ளனர். மக்கள் நலன் சார்ந்த திட்டங்களை அமல்படுத்தும் ஊரக வளர்ச்சித்துறையின் அனைத்துப் பணிகளிலும் ஈடுபடுகின்ற மக்கள் நலப்பணியாளர்களை பணி நீக்கம் செய்திருப்பது மக்கள் நலன் சார்ந்த பணிகளை கடுமையாக பாதிக்கும் என்பதுடன், மக்கள் நலனில் இந்த அரசுக்கு உண்மையான அக்கறை இல்லை என்பதை உறுதிப்படுத்துவதாகவும் அமைந்துள்ளது என்று அவர்கள் கூறியுள்ளனர்.

கொடூரமான இந்த அரசாணையை திரும்ப பெற்று மக்கள் நலப்பணியாளர்கள் அனைவருக்கும் இடையறவு (பிரேக்) இன்றி பணியில் தொடர வழிவகை செய்ய வேண்டும். நியாயமான இந்தக் கோரிக்கை ஏற்கப்படவில்லை என்றால், மக்கள் நலப்பணியாளர்கள் மட்டுமின்றி ஒட்டுமொத்த அரசு ஊழியர்களும் போராட நேரிடும் என்றும் அவர்கள் அறிக்கையில் தெரிவித்துள்ளனர்.

ஜெயலலிதா முதல்வர் பொறுப்பேற்று  ஆறு மாதங்களே ஆகியிருக்கின்றன. அதற்குள் தமிழகத்தில் இந்த அம்மையார் நடத்தியிருக்கும் அழிச்சாட்டியங்களும், அடாவடித்தனங்களும் பெரும் பட்டியலாய் நீண்டுகொண்டே இருக்கிறது. முணுமுணுத்த மக்கள் இப்போது கோபம் கொள்ளத் துவங்கியிருக்கின்றனர்.