“இப்படியொரு படத்தை நான் இயக்கவில்லையே!” - பாலுமகேந்திரா

2000 ஆண்டுகளுக்கு முற்பட்ட தமிழ்நாட்டு வரலாற்றை சித்தரிக்கும் “பாலை” திரைப்படம் நவம்பர் 25 அன்று தமிழகம் முழுவதும் வெளியாகிறது. இதுவரை மன்னர்களின் வரலாறே தமிழ்நாட்டின் வரலாறு என்றிருந்த தமிழ்த் திரையுலகின் மரபுகளை உடைத்தெறிந்து, முதன் முறையாக 2000ஆண்டுகளுக்கு முந்தைய எளிய தமிழ் மக்களின் வாழ்வியலைப் பற்றி சித்தரிப்பதாக இத்திரைப்படம் அமைந்துள்ளது.

இத்திரைப்படத்தை தமிழ் உணர்வாளரும், ஆய்வாளருமான ம.செந்தமிழன் இயக்கியுள்ளார். அதோடு படத்தின் பாடல்களையும் அவரே எழுதியுள்ளார். சங்க இலக்கியங்களில் உள்ள குறிப்புகளை சுமார் 6 ஆண்டுகள் ஆய்வு செய்து இத்திரைப்படத்தின் கருவை உருவாக்கி யுள்ளதாக அவர் கூறுகிறார். ஏ.ஆர்.ரகுமானிடம் இசைப் பயின்ற வேத் ஷங்கர், இசையமைத்துள்ள படத்தின் பாடல்கள் பெரும் வரவேற்பைப் பெற்றுள்ளன.

தேசிய விருது பெற்ற “போஸ்ட் மேன்” குறும்படத்தின் ஒளிப்பதிவாளரான அபிநந்தன் இராமானுஜம் இப்படத்தின் ஒளிப்பதிவாளர். இவர் எல்.ஜி.பிரசாத் திரைப்பள்ளியின் மாணவர். படத்தொகுப்பாளர் ரிச்சர்ட் சென்னை திரைப்படப் பள்ளியின் முன்னாள் மாணவராவார். இவர் தொகுத்த பல படங்கள் கோவா திரைப்பட விழாவில் திரையிடப்பட்டுள்ளன.

தஞ்சை, புதுக்கோட்டை சுற்றியுள்ள பல்வேறு இடங்களில் இப்படத்தின் படப்பிடிப்பு நடத்தப்பட்டது. பழங்குடித் தமிழர்களான இருளர்கள், பூம்பூம் மாட்டுக்காரர்கள் பலர் இத்திரைப்படத்தில் முதல் முறையாக திரையில் அவர்களாகவே தோன்றுகின்றனர். படத்தின் கதாநாயகன் சுனில் மற்றும் கதாநாயகி ஷம்மு ஆகியோர் தம் பாத்திரத்தை சிறப்புறச்செய்திருக்கின்றனர். இவ்விருவரைத் தவிர்த்து, படத்தில் நடிக்கும் அனைவரும் திரையுலகம் சாராத நபர்கள் என்பது குறிப்பிடத்தக்கது. நாகை தி.இரவி படத்தை தயாரித்துள்ளார்.

கடந்த மாதம் முக்கியப் பிரமுகர்களுக்காக திரையிடப்பட்ட படத்தின் விசேட காட்சியைக் கண்ட தமிழ்த் திரையுலகின் முக்கிய இயக்குநர்களான தங்கர் பச்சான், வெற்றிமாறன் ஆகியோர் படத்தை வெகுவாகப் பாராட்டினர். தமிழ் உணர்வாளர்களும், எழுத்தாளர்களும், ஊடகவியலாளர்களும் இந்நிகழ்வில் கலந்துகொண்டு திரைப்படத்தையும், படக்குழுவினரையும் பாராட்டினர்.

இயக்குநர் பாலு மகேந்திரா படக்குழுவினரை நேரில் தம் இல்லத்திற்கு அழைத்து அவர்களது முயற்சியை பாராட்டினார். தமது 45 ஆண்டுகால திரையுலக வாழ்க்கையில் இப்படியொரு திரைப்படத்தை இயக்கவில்லையே என்றும், இப்படம் உலக வரலாற்றுத் திரைப்படங்களின் வரிசையில் முக்கியப் படமாக அமையும் என்றும் அவர் படக்குழுவினரிடம் தெரிவித்தார்.

டேமேஜ் 999

திரைப்படக் கலைகள் மற்றும் அறிவியல் கல்விக்கழகத்தின் நூலகத்தில் டேம் 999 படத்தின் திரைக்கதை சேர்க்கப்பட்டுள்ளது. இந்த நூலகத்தில் வைக்கப்பட்டுள்ள முதலாவது இந்தியத் திரைப் படம் இது என்றும் திரையிடுவதற்கு முன்பே நூலகத்தில் சேர்க்கப்பட்ட படம் இது என்றும் கூறப்படுகிறது.

இந்தத் திரைப்படத்தின் பாத்திரங்கள் நவரசங்களை வெளிப்படுத்துவதாக இருக்கின்றன; இந்தியப் பாரம்பரிய ஆயுர் வேத மருத்துவமுறைக்கு முக்கியத்துவம் அளிக்கிறது; 2டி யிலிருந்து 3டி ஆக மாற்றிக் கொள்ளும் நவீன தொழில் நுட்பம் கையாளப்பட்டிருக்கிறது.

இதெல்லாம் சரிதான் என்றாலும் இந்தப் படம் கடுமையான சிக்கலை ஏற்படுத்தியிருப்பது ஏன்? 1975 ஆம் ஆண்டு சீனாவில் உள்ள பான்கியாவோ அணை அழிந்ததால் 2 லட்சத்து 50 ஆயிரம் பேர் இறந்து போன சம்பவத்தை மையமாகக் கொண்டு இந்ததப்படம் உருவாக்கப்பட்டுள்ளது.

ஐக்கிய அரபு எமிரேட்டில் உள்ள பிஸ்டிவி நெட்ஒர்க் நிறுவனத்தால் தயாரிக்கப்பட்டுள்ள இந்தப் படம் டைட்டானிக் போல கடந்த கால சம்பவத்தை நினைவுபடுத்துவதோடு நின்றிருந்தால் பரவாயில்லை. எச்சரிக்கை செய்கிறேன் பேர் வழி என்று கற்பனையைக் கட்டவிழ்த்து விட்டதுதான் சிக்கல்.

‘சின்னஞ்சிறு உலகம்’ திரைப்படத்தில் கல்யாண வீட்டில் நாகேஷ் தேம்பித் தேம்பி அழுவார். ஏதும் புரியாத விருந்தினர்கள் காரணம் கேட்பார்கள், அவர் அங்கே இருக்கிற குத்துவிளக்கைக் காட்டி இந்த திரியில் மணப்பெண்ணின் சேலை தீப்பிடித்து, மணவறை எரிந்து மணமகன் எரிந்து இந்த மண்டபமே எரிந்தால் என்ன ஆகும் என்று எண்ணிப்பார்த்தேன் அதனால் தான் அழுகிறேன் என்று காரணம் சொல்வார்.

இது நகைச்சுவை காட்சியாகப் போய் விட்டது நாமும் சிரித்துவிட்டு அமைதி அடைந்து விடலாம்; ஆனால் இரண்டு மாநிலங்களுக்கிடையே கொதிக்கும் பிரச்சனையாக இருக்கிற முல்லைபெரியாறு அணை விவகாரத்தில் ஒருபக்கமாக நின்று அணை உடைவது போலவும் அதில் ஆயிரக் கணக்கான மக்கள் அடித்துச் செல்வது போலவும் கற்பனை செய்திருப்பது எந்த விதத்திலும் நியாயமாகாது.

கலைக்குக் கற்பனை அவசியம் தான். ஆனால் அது அறிவூட்டுவதாக இருக்க வேண்டும்; ஆத்திரமூட்டுவதாக இருக்கக் கூடாது. மக்களை தெளிவுப்படுத்துவதாக இருக்கவேண்டும்; குழப்பி அச்சத்தையும், பீதியையும் கிளறிவிடுவதாக இருக்கக் கூடாது. இந்த இரண்டாவது காரியத்தைத் தான் டேம் 999 செய்திருக்கிறது.

இந்தத் திரைப்படத்தின் முக்கியமான பாத்திரத்தில் மலையாள நடிகர் திலகன் நடிப்பதாக ஒப்பந்தமாகி இருக்கிறது. ஆனால் அதற்குக் கேரள திரைப்பட ஊழியர்கள் சம்மேளனம் எதிர்ப்பு தெரிவித்துள் ளது. இந்தப் படத்தில் நடித்தால் அவரைப் புறக்கணிப்போம் என எச்சரிக்கை செய்துள்ளது. அதே சமயம் மலையாள திரைப்பட நடிகர்கள் சங்கம் திலகனுக்கு ஆதரவாக நின்றுள்ளது.

ஆலப்புழாவில் படமெடுக்கும்போதும் பல பிரச்சனைகளை படப்பிடிப்புக்குழுவினர் எதிர்கொண்டுள்ளனர். இவ்வளவுக்குப் பின்னும் கற்பனையான - இருமாநில உறவுகளில் சிக்கலை ஏற்படுத்துகிற திரைப் படத்தை உருவாக்கி அதனை வெளியிடுவதன் பின்னணியில் உள்ள நோக்கம் கேள்விக்குறியாகிறது.

கலை படைப்புகள் இணைப்பதற்காகவும் இணக்கத்தை உருவாக்குவதற்காகவும் இருந் தால் வரவேற்கலாம் - உறவுகளைக் கலைப்பதற்காக இருந்தால் ஏற்க இயலாது அல்லவா? அதனால் தான் டேம் 999 என்பது டேமேஜ் 999 ஆகியிருக்கிறது.

-மயிலை பாலு

வரவிருக்கும் மூன்று திரைப்படங்கள்

குடுகுடுப்பைக்காரர்கள் வாழ்க்கை

தாண்டவக்கோனே படத்தை இயக்கிய சுப்பு சுஜாதா, குடுகுடுப்பைக்காரர்களின் வாழ்க்கையை திரைப்படமாக்கவிருக்கிறார்.

இதில் வித்தியாசமான அம்சம் என்னவென்றால் கதையின் பின்பகுதி இலங்கை சிறைகளில் நடப்பதாகப் படமாக்கப்படுகிறது. சிவகங்கை மாவட்டத்தில்தான் குடுகுடுப்பைக்காரர்கள் மிகவும் பிரபலமானவர்கள். அவர்கள் வந்து சொல்வது பலிக்கும் என்று நம்புகிற மக்கள் ஏராளமானவர்கள் இருக்கிறார்கள்.

குடுகுடுப்பைக்காரர்களை நேரில் சந்தித்து பல தகவல்களை சேகரித்துள்ள சுப்பு சுஜாதா, கடந்த ஆறு ஆண்டுகளாகவே அவர்களைப் பற்றி ஆய்வு செய்து வருகிறார். கதையின் பின்பகுதி இலங்கை சிறைகளில் நடப்பது போன்று படமாக்குவது பற்றி அவரே கருத்து தெரிவித்துள்ளார். குடுகுடுப்பைக்காரர்கள் குறி சொல்லும் வழக்கத்தைக் கற்றுக் கொண்டதற்கும், இலங்கை சிறைக்கும் தொடர்புள்ளது. அதுதான் இப்படத்தில் காட்டப்படுகிறது என்கிறார். இப்படத்திற்கு இளையராஜா இசையமைக்க ஒப்புக் கொண்டிருக்கிறார்.


வாச்சாத்தி

தர்மபுரி மாவட்டத்தி வாச்சாத்தி கிராமத்தில் சோதனை என்ற பெயரில் பலதுறைகளைச் சேர்ந்த அதிகாரிகளும், ஊழியர்களும் கோரத் தாண்டவம் ஆடினார்கள். ஜூன் 20, 1992ல் இந்த சம்பவம் நடந்தது. மாநிலக் காவல்துறை சரியான விசாரணையை மேற்கொள்ளாத நிலையில், மத்திய புலனாய்வுக்குழு விசாரணையில்தான் குற்றவாளிகள் மீது வலுவான வழக்குப் பதிவு செய்வதற்கான தகவல்கள் கிடைத்தன. 19 ஆண்டுகள் கழித்து வந்துள்ள தீர்ப்பு, அநீதிகளுக்கு எதிரான போராட்டங்களுக்கு நம்பிக்கைத் தருவதாக அமைந்திருக்கிறது.

மக்கள் மத்தியில் பெரிய அளவில் பேசப்பட்ட இந்த சம்பவத்தை திரைப்படமாக்கும் நாஞ்சில் முருகேசன் என்ற தயாரிப்பாளரின் குமாரி டாக்கீஸ் நிறுவனம் முன்வந்துள்ளது. புதுமுகங்கள் நடிக்கும் இப்படத்திற்கும் வாச்சாத்தி என்றே பெயர் சூட்டியுள்ளனர். இச்சம்பவத்தால் காதல் ஜோடி ஒன்று பாதிக்கப்பட்டதாகத் திரைக்கதை செல்கிறது. வரும் 21ம் தேதி வாச்சாத்தி கிராமத்தில் வைத்தே இப்படத்தின் படப்பிடிப்பு தொடங்குகிறது.

நினைவுகள் அழிவதில்லை

ஏழை-நடுத்தர மக்கள் வசிக்கும் நகர்ப்பகுதி வாழ்க்கையை அனுபவித்து வாழத்துடிக்கும் இளைஞர்கள் ஜாலியாக இருக்கிறார்கள். அரசு திட்டம் என்று சொல்லி ஒரு முதலாளிக்கும்பல் அந்தப் பகுதியைக் காலி செய்து அபகரிக்க முயற்சி செய்கிறது.

விளையாடிக் கொண்டிருக்கும் இளைஞர்களுக்கும் அவர்களுக்கும் ஏற்பட்ட கைக்கலப்பில்  எதிர்பாராதவிதமாக அரசு அதிகாரி தாக்கப்படுகிறார். இதையடுத்து போலீசுக்குப் பயந்து இளைஞர்கள் நண்பனைத் தேடி கிராமத்திற்கு வருகிறார்கள். அங்கு வித்தியாசமான ஒரு விழா நடப்பதைப் பார்த்து நண்பனின் தாத்தாவிடம் அது பற்றி கேட்க, தாத்தா விவரிக்கின்றார்.

1943ல் விடுதலைப் போராட்டம் நடந்து கொண்டிருந்த போது கையூர் என்ற அந்த கிராமத்தில் நான்கு இளைஞர்கள், அந்த ஊர் விவசாயிகள் மற்றும் இளைஞர்களைத் திரட்டி பிரிட்டிஷ் அரசுக்கு எதிராகவும் உள்ளூர் பண்ணையாருக்கு எதிராகவும் கலகம் செய்கிறார்கள். பிரிட்டிஷ் போலீசும் பண்ணையாரும் சேர்ந்து ஒரு போலீஸ்காரன் மரணத்தை கொலை வழக்காக சதி செய்து இளைஞர்கள் மீது சுமத்தி தூக்குத் தண்டனைக்கு உள்ளாக்குகிறார்கள்.

வாழ வேண்டிய 20, 21 -வயதுகளில் நாட்டிற்காக துணிச்சலுடன் தூக்குமேடை ஏறிய இளைஞர்களின் வீரமிக்க வரலாற்றைக் கேட்ட நகரத்து இளைஞர்கள்,தங்கள் பிரச்சனைகளை தாங்களே எதிர்கொள்வதாகக் கூறி ஊர் திரும்புகிறார்கள். உழைக்கும் மக்கள் மீது அன்று தொடுக்கப்பட்ட ஒடுக்குமுறை இன்றும் தொடர்கிறது என்பதை அழுத்தமான ஒரு வரலாற்றுச் சம்பவத்தின் மூலம் சொல்ல வருகிறது “நினைவுகள் அழிவதில்லை” திரைப்படம்.

நாயகர்கள் நான்குபேர், இரண்டு கதாநாயகிகள் என புது முகங்கள் நடிக்கிறார்கள். தமிழகம் முழுவதிலுமிருந்து வீதி நாடக, தெருக்கூத்து கலைஞர்கள் பங்கேற்றுள்ளனர். இசை பி.ஆர். ரஜினி, படத்தொகுப்பு பீ.லெனின், ஒளிப்பதிவு புதுயுகம் நடராஜன், பாடல்கள் தனிக்கொடி, அருள், குமார், கதை, திரைக்கதை, வசனம், இயக்கம்- பகத்சிங் கண்ணன். தஞ்சை ஆம் பலாபட்டு குடிகாடு, ஒரத்தநாடு, ஈரோடு, பவானி, ஊட்டி போன்ற இடங்களில் படப்பிடிப்பு நடந்து முடியும் தருவாயில் உள்ளது. ஒரு வரலாற்று உண்மைச் சம்பவத்தை வித்தியாசமான முறையில் பதிவு செய்து உள்ளோம். டிசம்பரில் திரைக்கு வரும் என்கிறார்கள் படக்குழுவினர்.

அடுத்த மாதம் திரைக்கு வரும் ‘அரவான்’

தீபாவளி நேரத்தில் சுமார் பத்து படங்கள் தயாராகி வெளியாகக் காத்திருந்தன. ஆனால், பிரம்மாண்ட தயாரிப்பில் உருவான “வேலாயுதம்” மற்றும் “7ஆம் அறிவு” ஆகிய இரண்டு படங்களும் கிட்டத்தட்ட அனைத்துத் திரையரங்குகளையும் ஆக்கிரமித்துக் கொண்டன. மிஞ்சியிருந்த சில திரையரங்குகளை ஷாரூக் கான் நடிப்பில் வெளியான “ரா ஒன்” எடுத்துக் கொண்டது. இதனால் தீபாவளி நேரத்தில் பல படங்கள் வெளியாகவில்லை.

இப்போது முடங்கிய படங்கள் ஒவ்வொன்றாக வெளிவரலாம் என்று எதிர்பார்க்கப்படுகிறது. அதிலும் மற்ற படங்களை விட எந்தத் தயாரிப்பாளரால் திரையரங்குகளை கைப்பற்ற முடியும் என்பதுதான் தீர்மானிப்பதாக உள்ளது. முதலில், நடிகர் தனுஷ் மற்றும் நடிகை ரிச்சா நடிப்பில் உருவாகியுள்ள “மயக்கம் என்ன” என்ற படம் வெளியாகப் போகிறது. நவ.18 ஆம் தேதியன்று இந்தப்படத்தைத் திரையிடத் திட்டமிட்டுள்ளனர்.

அதாவது, எந்தெந்தத் திரையரங்குகளில் வேலாயுதம் மற்றும் 7ஆம் அறிவு ஆகிய படங்களை எடுத்துவிடப் போகிறார்களோ அங்கெல்லாம் வாய்ப்பு கிடைக்கிறது. இந்த மாத இறுதி வரையில் வேறு பல திரையரங்குகளிலிருந்தும் இந்தப் படங்கள் வெளியேறும் வாய்ப்புள்ளது. அதைக்கணக்கில் கொண்டுதான் “வெயில்” மற்றும் “அங்காடித்தெரு” படங்களைத் தந்த இயக்குநர் வசந்த பாலனின் அரவான் படம் டிசம்பர் முதல் வாரத்தில் வெளியாகலாம் என்று எதிர்பார்க்கப்படுகிறது. அந்த நேரத்தில் வெளியிடுவதற்கான வேலைகள் தற்போது நடந்து வருகின்றன.

இத்தகைய வாய்ப்புகளை நழுவவிட்டால் பொங்கலுக்கு மீண்டும் “நண்பன்” போன்ற பெரிய பட்ஜெட் படங்கள் வந்து திரையரங்குகளை ஆக்கிரமித்து விடும் என்ற நிலை உள்ளது. அதற்குள் வெளியாகாவிட்டால் அதன்பின்னர் பள்ளித்தேர்வுகள் என்று ஏப்ரல் மாதம் வரையில் தள்ளிப்போய்விடும் அபாயம் உள்ளது என்கிறார்கள் திரைப்படத்துறையினர்.